un projècte educatiu pels descendents dels esclaus en Mauritània

Dimars, 1 de decembre de 2015, 03h00 Societat,Politica,Internacional

Un projècte educatiu pels descendents dels esclaus en Mauritània

L’UNPO e IRA Mauritània lançan un projècte d’alfabetizacion pels enfants haratins. Aquela comunautat patís encara de formas d’esclavatge e una intensa discriminacion sociala e politica


Marrit Flac Bon Plan bon Fabulós (2 vòtes)


E mai se constituisson una partida plan significativa de la populacion mauritana, los haratins o arabis negres son subjèctes a la discriminacion politica e sociala, e una partida d’eles se veson quitament esplechats dins de condicions d’esclavatge. Un projècte impulsat per l’UNPO e per l’associacion IRA Mauritània ensajarà de donar de nòvas oportunitats als enfants haratins, descendents d’esclaus, per que, a travèrs de l’educacion, pòscan optar per un futur melhor.
 
Lo projècte vòl trencar lo “cicle de la discriminacion e de l’exclusion” qu’aqueles enfants an eiretat de lors parents e de lors grands. L’accion se centrarà sus las comunautats de Dar Al Bayda e Riyad, dins la capitala mauritana, Nuakshut, ont d’enfants haratins recebrián de classas d’alfabetizacion pendent sièis meses.
 
“Lo simple fach d’aver de cacacitats de lectura e d’escritura transformarà lors oportunitats [d’obténer] un emplec e de ganhar lor vida”, çò argumentan las doas organizacions. Aquestas cèrcan de contribucions a travèrs d’una plataforma de microfinançament per poder pagar los materials e lo professorat necite pel projècte. La soma totala que demandan las entitats es de 3000 dolars.
 
 
Tres grands grops de populacion en Mauritània
 
La societat mauritana es devesida en tres grands grops. Segon de donadas del Grop dels Dreches de las Minoritats (Minority Rights Group), los beidans o arabis blancs constituisson entre lo 15% e lo 20% de la populacion. Son l’elèit del país: “Contraròtlan l’economia e la granda majoritat de l’estat administratiu, compreses lo govèrn, l’armada e la polícia”, çò explica aquel raport de 2010 de las Nacions Unidas sus l’esclavatge en Mauritània.
 
Los haratins, o arabis negres, son lo segond grand grop, aperaquí lo 40% de la populacion. Per una granda partida son de descendents de las populacions africanas negras mas islamizadas e arabizadas lingüisticament e culturala. Los haratins son estats long dels sègles un grop esclavizat de part dels beidans. Pendent lo sègle XX, una partida dels haratins obtenguèron de mai en mai de libertat del temps que d’autres restèron someses a divèrsas formas d’esclavatge, e mai se las leis francesas —d’en primièr— e mauritanas —puèi—o enebisson. Segon lo Global Slavery Index, lo 4% de la populacion mauritana contunha de viure en regim d’esclavatge. D’autras fonts elèvan la chifra fins al 15%.
 
Los haratins liberats passan a formar la classa mai paura de la societat mauritana e, en consequéncia, patisson divèrsas sòrtas de discriminacions, que dins lo cas de las femnas son mai que mai grèvas.
 
Lo tresen grand grop de la populacion mauritana son los pòbles non arabis, que constituisson entre lo 40% e 45% de la populacion —d’autras fonts baissan aquela proporcion al 30%—. Se tracta sustot de wolòfs, de soninkés, de puls e de tocolors, fòrça concentrats al sud del país, près de la frontièra senegalesa.


Aqueste articles es adaptat de Nationalia amb qui Jornalet manten un acòrdi de cooperacion.

----------------------------

https://chuffed.org/project/educationspellsfreedom

Be a part of this amazing effort and
help break the cycle of descent-based slavery.

Your support will have a tangible impact on the lives of former slaves.

Donate now and give a Haratin woman or child the gift of an education!

Find out more about the campaign here.